خماسيات حليم

خماسيات حليم

دكتور محمد عبد الحليم عبد الرازق
شاعر اسكندراني ... يعشق الشعر
والزجل ... كلمات جميلة
باسمة ترسم الضحكة الصافية
على وجه قارئها

ان شاء الله تعجبكم

ضحكتك في البيت تِوَنِس كُحِتَك في البيت نغم
حتى لو كحيان مفلس برضو عاوز تنسجم
لمة الفول المدمس والبصل فضل ونِعم
لما مابنسمعش منك لينا غير كلمة نعم
قوم ياشمس الصُبح والبس يرزقك رب الكرم
.................

انتا كل حياتي بس رح تعرف منين
انتا مفتاح الحياة وبقول لمين
انت مش ليك قلب وف وشك عنين
يعني ماجربتش الشوق والحنين
ليه قلبي فياض بالحنان قلبك ضنين
..................

انا كنت باتمنى طيفك ولما زارني ارتجفت
طلعلي م الحيطة ابيض من بياض اللفت
ادي دقني لو شُفت نوم ودي دقني لو خلفت
انا قُلت عايز شبح ؟ فهمتني ازاي يازفت
كان قصدي اشوفك معايا زي ماوَلِفت
...................

كدبة ابريل راحت تشتكي حزب الاشرار
السوق رطرط ووقف حالها وعيشتها مرار
كنا بنكدب في السنة مرة تفاريح وهزار
دلوقتي بنكدب في المرة عدة امرار
طب ليه بيقولوا اللي بيكدب بيروح النار
...................

جدي ركب سفينة نوح مع الناجين
وادي النتيجة ايمان بقراية الفناجين
جدي تحرر من الأوثان والشياطين
ونا كل ماأحفر نفق ألقاني لسه سجين
مع إني عندي يقين رب الخلايق مين
..................

مين راح يطبطب عليك ياحبيبي متدورش
الكل عايز طبيب حتى الطبيب في الفرش
طبطب على ضهر غيرك ولا ماتقدرش
تنسى الآلام تشتري كل السعادة بقرش
صدقني حتكون سعيد يالا ماتتأخرش

تسلمي